TIE DYE

Tun țum chu Tie Dye chungchang hi sawi teh ang.Eng nge Tie Dye chu?Engtik hunlai ațanga rawn lar a rawn irhchhuak nge tih te kan sawi dawn a ni.

TIE DYE AWMZIA:-

Tie Dye awmzia chu puan emaw kawr emaw kha kan duh dan bik a bawk\țawn a ze nei tur a rawng kan far kual tir vel kha a ni deuh ber mai!

Tie dye hi 1960s bawr vel khan American zaithiam pahnih,Hippie kalphung leh nunphung zawm tlat tu Janis Joplin leh Jerry Garcia ten an han uar chho va,mahse uluk zawka a chinchhuak a an han zir chian chuan hmasang Asia khawmualpui ah an lo uar in an lo ching hmasa daih tawh a ni.

Chutih rual erawh chuan Tie Dye hi khawvel ram hrang hrang a hnam hrang hrang te nunphung ah engemaw zawng takin a lo bet fur tawh a.United States ah chuan Hippie ho hunlai in a lar chho va.American nunphung ah hian 1920s lai khan a lo bet tlat tawh a ni.

HMASANG ASIA KHAWMUALPUI AH:-

Chhinchhiah a hriattheih a nih chin ah Tie Dye hi China leh Japan ram ațanga rawn lar a rawn chin chhuah a ni a.T'Sang Dynasty(T'ang thlah ho in ram an awp a an rorel lai) China ram ah 618-906CE leh Japan ramah Nara Period 552-794CE lai vel anih chu.

Hetih hunlai hian Theihmu te,thinghnah leh zung te,pangpar hmang ten an puan leh thawmhnaw ho rawng chu an thlak ta țhin a ni.

Derhken par,hnim hnah,purunsen,țing,lung chunga hlobet leh theihmu te hi an hman uar zual a ni,a rawng a rawn chhuah theihna turin heng kan sawi ho te hi tui ah an chhuang so a,an thawmhnaw leh puan te chu an thlak a,an rawng duh ang tak a chhuah hma chu chiah in an chhuang\chhum ta char char mai țhin a ni.

India ramah pawh kum Zabi 6na ah chuan Tie Dye hi an lo ching ve ta a,a hming ah chuan Bandhani an vuah a,khawl la zai  in,chingchivet nuaih in puan chu an țawn khawm a,rawng an siam sa dye ah chuan puan chu zu thlak\chiah a,an țawnkhawm ho zawng ah khan rawng chu a kai\luanglut ve lova,a lo rang ta nuaih țhin a;hetiang hian tun thlengin an ching chho ta a ni.

                     (Inset:-Bandhani dye)

Shibori hi Tie Dye chi khat tho ni in kum Zabi 8na ah Japan leh Indonesia ramah an ching țan a.Vawiin ni thleng hian heng ram pahnih ah hian an la ti chho char char ani.Kimono an tih mai,kawr ban nei,dual hnuk T-Shape a thui chei nan te Shibori Design hi an hmang țhin a ni.

Shibori Design an siamdan dang leh pakhat chu thingtum ah puan chu nghet deuhin an vet kual a,hrui in an țawn hnan leh a,an bilh lut thlap a,a chhunglam a awm leh an bilh luh ho kha rawng a kai ve dawn lo ani.

                      (Inset:-Shibori dye)

Momoyama Period 1568-1603CE khan Tie Dye chikhat Tsujigahana an hmuchhuak leh a Chinese ho lehkhatui an tih mai Sumi hmangin an siam țhin a ni.

Puan ah chuan Sumi hmang chuan milem an ziak a,chumi zawh ah rawng ah an zu chiah a,hetia an zu chiah hian rawng chu milem an ziah lohna zawng ah chuan a kai a,milem ziah kha a lang duk\thim deuh a,a langchiang ta bik ţhin a ni.Vawiin ni thleng hian hetiang Sumi Design hi hmuh tur a la awm in an la siam țhin a ni.

                  (Inset:-Tsujigahana dye)

TIE DYE AMERICA RAMAH A LO LAR ȚAN:-

United States ah chuan Roaring 20s an tih mai,Indopui an hmachhawn zawh a zalenna leh hausakna an neih țan leh bawr vel,North America ah pawh electronic bungrua ten hma an sawn chho lai vel kha a rawn lar hmasak hun chu a ni.

Great Depression an tih mai,khawvel pun a sum lam a tlakchhiat hun(thla 43)a thlen lai 1930s lai pawh khan Pamphlet(lehkhabu te,thu thehdarna)sem chhuak in an in leh a vel te pawh Tie Dye a chei vek turin thu an chhuah in Lapua,Coffee leh Chhangphut hmanga in leh a vel chei dan tur te bakah heng hmanrua hmang a Tie Dye siamdan tur te thleng in an ziak a ni.

Hetia Pamphlet semchhuak hial a chet an lak vak na mai hian a tum ber chu hmeichhe ho in sum seng miah lova an thil neihsa hmanga thil thar siamchhuah dan zirtir a kawhhmuh an tum vang ani ber a,hetih hunlai hian ram sum dinhmun kha a tlakchhiat em vang a ni.

Hippie Hunlai:-

1960s chho kha kum dang zawng aia Tie Dye an uar kum ber a ni a,thlalak han en let pawn a tu a te mai pawh kha thawmhnaw dye tial rei ruai ha a sam engtin tin emaw a han phiar kual a,headband emaw scarf emaw a lu an țawn te,țhi fual pui pui awrh hlir mai hmuh tur kha a awm a.Mak ve tak mai chu heng hunlai hian an thawmhnaw dye hak design inang reng reng inang chiah chiah hmuh tur a awm lo kha ani,heihi he mi hun chhung a cheng te pawn nuam an tih chhan pawh ani a,he dye hian hautak leh sum seng em em si lovin mahni thiamthil leh themthiamna lantirna ah an ngai tlat a ni.

                          (Inset:- Hippies)

Tie Dye siamtu lar tak pakhat Rit Dye hi a hlawhtinna bulpui ber chu Tie Dye hi a ni.Hippie hunlai hian Rit Dye hi harsatna tamtak tawkin tlakchhiat lam a pan a,mahse amah chhanhim turin Don Price a rawn lang ta,Don Price hian Rit Dye tan New York a Greenwich khua ah Tie Dye sumdawnna beihpui a thlakpui ta a,he hmuna mipui vantlang tamzawk hi Hippie nunphung zawm deuh vek an lo ni bawk nen Don Price chuan in tinah luhchhuah in Tie Dye a thawmhnaw leh thil dang siamtu te hnen ah Rit company siam thawmhnaw dye na te chu an hmang duh ang em?tiin a zawhah ta a,chutah chuan Price chuan kutthemthiam Will leh Eileen Richardson,thawmhnaw leh puan dye leh design nan a Rit Dye hmang duh te nen chuan an in tawng ta a.

Price chuan chung an siamchhuah sa chu Fashion Designer leh Editor te entir in a țial dan tur leh zia rang vel chu designer Halston in a lo buaipui thung a.Hetia an han chet a,an lar tak tak hnu hian khang hunlai a mi lar hmingthang Janis Joplin leh Jerry Garcia te hial pawh chuan an lo hak sak ta a. American țhalai rual ho chuan an ching țan ta sup sup mai a ni.

1960s,1970s chhung zawng khan Tie Dye hi T-Shirt ah chauh lo pawh an hmang nasa em em a,banner,bag,blanket leh inchhung a bungrua an dahna an khuhmawina chei nan te thleng in an hmang vek a,heng hunlai a an fashion hrim hrim hi thuthleng a an rinpui ber niin kum 2\1 dan ah a chhuak in a rawn let leh deuh reng a ni.

1980s leh a hnulam ah:-

Tie Dye kawr hi chuai tak tak hun awm lovin kum 2\1 dan ah a rawn let reng a,1980s ah phei chuan sang taka invawrh chho in Fashion Designers ho pawn Fashion Show an huaihawt pawn an models te an inbeltir ta zel a,hmanrua leh khawl te lo changkang chho zel hian a hma aia rawng daih rei tur leh kai rei tur te an siamchhuak ta zel a.

1980s kum a an dye siam chhuah phei hi chu kum hmalam a an siamchhuah aiin a kai rei in a daih rei zawka,rawng chi kim thlan tur pawh a tam bik a ni.

                  (Inset:-Spiral Rainbow dye)

Hippie leh Tie Dye inzawmna:-

Hippies ho hian Vietnam War(1955-1975)kha dodal in inremna leh hmangaihna chawi nun an tum tlatin thuamhnaw rawng lar tak tak(Sen,Eng,Serthlum rawng,Hring leh nainawk rawng)te chu mit ti vai chem chem thei tur ang in rang rei ruai a chei chu an ha a,chu an thawmhnaw rawng in chawhpawlh leh ran dan vel chu Tie Dye an tih hi a lo ni ta a ni.

T-Shirt,kekawr,lukhum,jumper(kawrlum pum) ah te a tih theih vek a.Sawi tawh ang in țhin hun leh uar loh hun tak tak hi a awmlo mai thei a ni,kum 1 vel chu an reh ang a,a rawn let leh zel hi ka ring ve tlat!

                    (Inset:-Crumple dye)

TIE DYE SHIRT SIAM DAN:-

• Puan chu a plain ani tur a ni,a var or a dum or eng rawng pawh ni se.Cotton emaw Nylon emaw Silk emaw a nih pawh in,duhthusam ah chuan Cotton a țha ber,a chhan chu rawng a bet nghet bik a,a rawng tih lar zual deuh duh phei chuan chi(1tbsp)telh zeuh kha ni mai.
• Rubber band,Sakawrbawkcheh, rawng(dye)(online ah lei mai theihin a awm ta)Bucket leh Soda ngai leh bawk ta,Apron,kutkawr bun tur nen.
• Kawr chu rubber band in chingchivet nuaih in i țawn ang a,bucket ah soda leh tuilum i dah ah chuan i zu thlak ang a,soda hian rawng(dye)khan nasa takin a lo pui dawn a ni.10 to 15 minutes vel  chiah char char ang a.
• Kawr chu la chhuak leh in dye chu I far tawh mai dawn ani.a rawng kai dan i duhdan a zir in i far nawn sek mai dawn ani (i duh dan design a a chhuah theih nan hian kawr i țawnkhawm dan khan a zir a ngai thung a ni)Rawng hi kut leh kawr vela a kai nuaih duh avang hian Apron bah a kutkawr vuah theih ngei ni se.
• Rawng I far zawh vek ah i nghak deuh vang vang mai dawn a ni.Rawng dal deuh i duh chuan nghah rei vak a ngai lova,mahse rawng lar leh tak a chhuak tur a i duh chuan zankhua a i nghah a ngai dawn a ni
• I țawn na Rubber Band chu i chepchat ang a,thing pharh in tuilum ah i chiah leh ang a,tui daih thleng in,dimte a sawr in a ro theih nan i zar pharh leh ang a,a ro hnuah tuivawt in suk pangngaiin i su tawh mai dawn nia.Suk hmasak vawi 1 na ah hian a rawng a kal deuh țhin avang in a mal in emaw,thawmhnaw rawng thim lam nen pawh suk pawlh a pawi lo.
  

A rawn lar chhuah chhan a chu eng pawh ni se Fashion ah la lut in kan ha ta zel chu a ni a,khawvel a lo changkan chhoh zel ang in a hmanrua leh khawl leh design te,a rawng te thleng in duhthal in thlan tur a tam tawh a,Online Shopping ah lei theih mai in a awm vek tawh a,a lo to vak lo nen mahni duh dan dan a rawng kal thlak dan tur lo duan a,a ziarang lo siam pawh khan a mawi leh vek zel tho a ni!